Kolbjörn, Mundi og Helga með áfengisvandamál

Á New York flugvöllum er daglegt brauð að færa menn í gæslu eða á spítala vegna misnotkunar á áfengi. Það þykir fréttnæmt vegna þess hvernig brugðist er við til að tryggja öryggi farþega. Einn og sama dag eru þrír Norðurlandabúar teknir og færðir á spítala vegna áfengiseitrunar. Einn flugmaður og tveir ferðamenn. Allt menntaðir einstaklingar með áfengisvandamál. Oft eru það þeir sem fá mesta meðaumkun og draga á langinn að fara í afvötnun þrátt fyrir aðvaranir.

Í netheimum fara fram logandi umræður um flugdólga og skal engan undra. Mikilvægt er að menn kunni að bregðast við nógu snemma í háloftunum. Í íslensku flugvélinni eru það flugfarþegar frá Mið-Ameríkuríki og íslenskur flugmaður sem geta bundið niður manninn. Þeir hinir sömu eiga á hættu að verða fyrir meiðslum. Ef illa fer og viðkomandi flugdólgur verður fyrir öndunartruflunum eiga þeir möguleika á að verða ákærðir. Þeir sem selja sterkt vín í flugvélum eða í flughöfn eru líka í skotlínunni. Allir bera ábyrgð, líka þeir sem gera ekki neitt.

Umræðan er góð og sýnir hve netheimar eru mikilvægir til að skapa lausnir. Í New York er bannað að selja ungmennum undir 21 ára áfengi á börum að viðurlögðum stórum sektum. Sama gildir um að fleygja rusli á götur. Hér eru þessi mál ekki tekin nógu föstum tökum, en skattgreiðendur látnir borga hreinsun og lögregluaðstoð. Veitingamenn hafa líka ábyrgð.

Forvarnarmenning í skólum landsins er eftirtektarverð og hefur skilað miklum árangri gegn ótímabæri áfengisneyslu. Ekkert er ömurlegra en skólaböll með útúrdrukknum einstaklingum. Hið góða er að hér er boðið upp á skjóta áfengisafvötnun, sem er til fyrirmyndar. Margir undrast umburðarlyndið gagnvart brotamönnum. Af hverju þeir eru ekki skyldaðir til að fara í meðferð eða að greiða sekt.

Farþegar héldu flugdólginum niðri