Fráveita og reikningskúnstir

Þegar nöfnum á opinberum fyrirtækjum, borgarsviðum og gjöldum er breytt í sífellu veldur það tortryggni. Orkuveitan kýs nú að kalla holræsagjöld fráveitugjöld. Fráveitugjöld eða holræsa og rotþróargjöld eru lögð á af sveitafélögunum. Yfirleitt eru þau 0.12 % af fasteignamati eins og í Garðabæ, í Hafnarfirði 0.16 % sem er með því hæsta. 

Orkuveita Reykjavíkur virðist hafa sérstöðu og byrjar nú að reikna þessi gjöld eftir fermetrum húsnæðis. Hjá sumum gjaldendum þýðir þetta miklar hækkanir. Ástæða er fyrir greiðendur að bera vel saman holræsagjöld fyrri ára við þessa nýju aðferð Reykjavíkurborgar og mótmæla. Ótrúlegt er að löggjafinn skuli ekki njörva betur niður gjaldstofna sveitafélaga. Það hefur sýnt sig að staða Orkuveitunnar getur orkað tvímælis eftir því hver reiknar, en hún á að sjá um fráveitu fyrir borgina.

Ef fram heldur sem horfir geta reiknimeistarar Besta flokksins og Samfylkingar fundið það út á næsta ári að betra sé að innheimta eftir fjölda salerna, rúmmáli eða fjölda glugga til suðurs.